Nepali
English
काठमाडौँ – राष्ट्रिय स्वतन्त्र पार्टी (रास्वपा) संगठन निर्माणमा जुटेको छ । विभिन्न पार्टीले विभिन्न तहका समिति निर्माण गर्दा सोही तहको भेला, बैठकले गर्ने गरेको भए पनि रास्वपाले त्योभन्दा फरक शैलीमा डिजिटल प्लेटफार्म मार्फत संगठन निर्माणमा जुटेको हो ।
प्रतिनिधिसभा निर्वाचन क्षेत्रीय समिति गठनका लागि पार्टीले उम्मेदवारको प्रारम्भिक नामावली बिहीबार प्रकाशन गरेको छ । संगठन विस्तारका क्रममा रहेको रास्वपाले यसअघि नै निर्वाचन क्षेत्रभित्रका पार्टीका सदस्यबाट खुला आवेदनमार्फत निर्वाचन क्षेत्र समिति गठनबारे जानकारी दिँदै निवेदन आह्वान गरेको थियो ।
प्राप्त निवेदनको आधारमा रास्वपाले प्रारम्भिक समितिको नामावली सार्वजनिक गर्दै सातै प्रदेशमा संगठन निर्माणका लागि जिम्मेवारी तोकेको छ । सातै प्रदेशमा समिति गठन गर्दै राष्ट्रिय स्वतन्त्र पार्टीमा रुची राख्नेहरुको लागि काम गर्ने ठाँउ दिएको छ । साथै उक्त समितीलाई निर्णय गर्ने अधिकारसमेत दिइएको छ ।
समितिमा रहन पार्टीका सदस्यहरूबाट इच्छुकले १५ चैतसम्ममा आवेदन दिएको महामन्त्री एवं प्रवक्ता डा. मुलुल ढकालले जारी गरेको विज्ञप्तिमा उल्लेख छ । पार्टीको एपमार्फत आवेदन प्राप्त भएपछि एपमार्फत नै ती नामावली सार्वजनिक गरिएको हो ।
रास्वपाले नामावली सार्वजनिक गर्दै ११ जेठ बिहान १० बजेदेखि १२ जेठ साँझ ६ बजेसम्म दाबी विरोध तथा उम्मेदवारी फिर्ता गर्न सकिने समय दिइएको छ । यसका लागि सम्बन्धित प्रदेशको दाबी विरोध छानबिन समितिसँग सम्पर्क गर्नुपर्नेछ ।
१६ जेठ बिहान ७ बजेदेखि २० जेठ साँझ ७ बजेसम्म रास्वपाको मोबाइल एप (पार्टीको वेबसाइटमार्फत मतदान गर्न नमिल्ने)बाट मतदान गर्न सक्ने व्यवस्था पार्टीले गरेको छ ।
निर्वाचनको सम्पूर्ण परिणाम २० जेठमा पार्टीको मोबाइल एप र सामाजिक सञ्जालमार्फत प्रकाशन गर्ने रास्वपाले जनाएको छ ।
